منتديات قبيلة المهيمزات الرسمي - يا بجاد شب النار وادن الدلال

يقول مـن عـدا علـى رأس عالـي

رجمن طويلن يدهلـه كـل قرنـاس

في راس مرجو من عسيـر المنالـي

تلعب به الأرياح مـع كـل نسنـاس

في مهمهن قفرن مـن النـاس خالـي

يشتاق له من حس بالقلـب هوجـاس

قعدت فـي راسـه وحيـدن لحالـي

براس الطويل ملا بقه تقـل حـراس

متذكـرن فـي مرقبـي وش غدالـي

وصفقت بالكفين يـاس علـى يـاس

أخـذت اعــد ايامـهـا والليـالـي

دنيا تقلـب مـا عرفنـا لهـا قيـاس

كم فرقت مـا بيـن غالـي وغالـي

لو شفت منها ربح ترجـع للافـلاس

ياما هفـا بـه مـن رجـال مدالـي

ماكنهم ركبوا علـى قـب الافـراس

ولا قلطوهـن للكمـيـن المـوالـي

ولا صار فوق ظهورهن قطف الأنفاس

ولا ردد واصـم الرمـك للتـوالـي

كلن يبي مـن زايـد الفعـل نومـاس

مـن بينهـم سمـر القنـا والسلالـي

مثل البروق برايحـن ليلـه أدمـاس

يقطعـك دنيـا مالهـا اول وتالـيـل

و اضحكت للغبن تقـرع بالأجـراس

المستريح اللـي مـن العقـل خالـي

ما هـو بلجـات الهواجـس غطـاس

مـا هـو بمثلـي مشكلاتـه جلالـي

ازريت اسجلهـن بحبـرن بقرطـاس

حملـي ثقيـل وشايلـه باحتمـالـي

واصبر على مر الليالـي والاتعـاس

وارسي كما ترسي رواسـي الجبالـي

ولا يشتكي ضلـع عليـه القـدم داس

يا بجـاد شـب النـار وادن الدلالـي

واحمس لنا يا بجاد ما يقعـد الـراس

ودقة بنجـرن يـا ظريـف العيالـي

يجذب لنا ربعن على اكـوار جـلاس

وزلـه ليامنـه رقـد كـل سـالـي

وخله يفـوح وقنـن الهيـل بقيـاس

وصبـه ومـده يـا كريـم السبالـي

يبعد همومـي يـوم اشفـه بالانفـاس

فنجـال يغـدى مـا تصـور إببالـي

روابع ناخذ بهـا اخمـاس واسـداس

لا خـاب ظنـي بالرفيـق الموالـي

مالي مشاريهـن علـى نايـد النـاس

يا عل قصرن ما يجـي لـه ظلالـي

ينهار مـن عالـي مبانيـه للسـاس

لا صار مـا هـو مدهـل للرجالـي

وملجا لمنهو يشكـي الظيـم والبـاس

بحسناك يا منشـي حقـوق الخيالـي

يا خالق اجناس ويـا مفنـي اجنـاس

تجعـل مقـره دراس العهـد بـالـي

صحصاح دو دارس ما بـه اونـاس

البـوم فـي تالـي هدامـه ايـلالـي

جزاك يا قصر الخنا وكـر الانـداس

متـه تـربـع دارنــا والمفـالـي

وتخضر افياض عقب ما هي ابيبـاس

نشـوف فيهـا الديدحـان متـوالـي

مثل الرعاف بخصر مدقوق الالعـاس

وينثر على البيـدا سـوات الزوالـي

يشرق حماره شرقة الصبـغ بالكـاس

وتكبـر دفـوف معبسـات الشمالـي

ويبني عليهن الشحم مثـل الأطعـاس

للشاعر : محمد الأحمد السديري رحمه الله