مفهوم حسن الخلق!؟
 

‏بسم من بدا بأمره بحرفين كاف ونون
الاول والآخـر مـامـعـه واحـدً ثاني

له الحمد والمنـه وتسـبيح مـاب الكون
وله الملك كله يـارثـه والبـشـر فاني

عليه اتكالي طـول عمري وأنا ممنون
اسـأله على درب أهل الخير يقداني

بعد ذكره الشده وصعب الأمور تهون
وظهـر للخبر مبـدأ ونظم الشـعرزاني

ابى ابحث عن اليمه مع القصد والمضمون
ومفهوم حسن الخلق من فيض وجداني

واسميه شـجـره مثمره خيرها ميمون
مـاوارى التراب جـذروهـا خلق رباني

ذكره الولي في محكم كتابه المكنون
ووصف فيه طه المصطفى نسل عدناني

على ساس مبداه الشريعه فخر واحصون
حبـاه الكريـم احمـاه عن كـل نقصاني

مـايوصـف بغيـره فـاز وامتـاز نوع ولون
مواريـه بـاللي فـيـه تـنـزيـه وإيماني

حليم على الجاهـل ولايواخـذ المجنون
ويعين الضعيف ويجزي السيء باحساني

حشـم من تحلابـه عن الناقصـه والهون
سماء واعتلا شـأنـه عن الهـزل والداني

ملامح نقاء يوسف ورهبة نداء ذا النون
وجـبـروت صبر إيوب في كـل ماكاني

وهيبـة نبي الله موسى على فرعون
ومكارم شفيع الخلق في زوغ الاذهاني

ياكثر الخصال الحسنه اللي بها مقرون
لكن اضمحل الفكـر والوقت عجلاني

يقـل الكلام ويسكت الماهـر الملسون
ويجف اليراع وملهم الحرف ماعطاني

‎عايض المهيمزي