يا ناصــر الفراعــنه سلام ناصـيـك السلام
ياصلك يابن الـــلابه اللي بالمــواقـف تعتلــي

يابن أسبيـع اللي لهـم بالمـجد تاريخ ومقــام
من ماضي الدنيا وهم شجعـان نار(ن) تصطـلي

أهل الفعـايل ربعــك السبعـان ما فيهــم كلام
بيت الكرم ساس الوفــاء أهــل الحـزام الممتلي

مروين حـد أسيوفهـم يوم المغـازي بالجهـام
ومزبنـين اللـي زبنهـــم عـن عـــدوة يدخـلي

ولا وقتنا الحاضر وهــم بالعز ممشـاهم لأمـام
قبيلـة(ن)مثـل القبـايل قــدرها مـايــنزلي

وأنت الذي من عرضهــم شاعر ولابس للوسام
بالشعر يضـربك مثل كـل(ن) منك متهـولي

ليا صخرت القافيــة مشيتهـا بسيــر النظـام
تصارع أجنون القصيد اللـي معك تسترسلـي

تغوص ببحــور المعـاني لين تاصل للمـرام
يشوش راسك بالطناخة والشجاعة تصمـلي

يشهد لك أعلام الفضاء وتشهد جماهير(ن) احشام
وتشهد مقالات الصـحف اللي عن اسمك تنقلي

وأنا اشهد أنك شاعر(ن) شعرك مثل رمي السهام
بنات فكرك لا حضرت مثل الجـواهر والحلـي

في كل طرق(ن) تطرقه برقك حقوق(ن) بالغمام
سبحان من فـي قـدرته تنقض بيوت وتفتـلي

وصلاة ربي عـد من صلى بها الــدنيا وصام
على النبي اللـي مكلـف بالرسـالة مرســلي