السلام عليكم ورحمة الله وبركاته
هذه قصيده جديده لشاعر المبدع عبدالله باتل الرشيدي انقلها لكم
مالك سنع مـدام ماعنـدك فلـوس
كـن العـرب لاجيـت مايرغبونـك
ولاانت بمحسوس ولاانت بملمـوس
ولانشـدٍ عنـهـم ولاينشـدونـك
ومقعادك إن ابطيت مقعاد مضروس
مـن كثـر مابعيونهـم يلخصونـك
وإن جيت مره ثانيه قيـل دبـوس
وإلا بعـد ورعانهـم يضربـونـك
وفعلاً تحس انك مع الناس متعـوس
وتدخل بعقلك مشكله مـع إجنونـك
ويناحسك لاجيتهـم كـل منحـوس
وتبلـش لاسولفـت ويقاطعـونـك
ولاعندهم خلقٍٍٍ لمثلـك ولا إنفـوس
ولو تسرَقْ أيـا حاجـةٍ يتهمونـك
وتصير نفسك نفس رجال ملبـوس
ونوب بلا داعـي إطيـر عيونـك
إما عليها تدوس وتدوس وتـدوس
وسيع وجـه تصيـر ويجاملونـك
وإلا الوجيه تصير في وجهك عبوس
تـقـول تعرفـهـم ولايعرفـونـك
وتبطي وهمك فيك وإدوس وتحوس
وإن عنك سمعو في غنـاةٍ يجونـك