قصيدة الخيااااانه (قوية ياشاعرها)
لا ردك الله لا ولا اطلب تردين=ادعي عليك بعثرة في صلاتي
عثره تشلك ما بعدها تقومين=يا قاتلتني يوم صرتي حياتي
خدان لك بالقلب كانت بساتين=وريضان وغصونا بها يانعاتي
كنتي مناة القلب والروح والعين=واليوم عينك يعلها ما تباتي
كنت أحسبك للعهد والحب توفين=قلتي الغدر بالحب ماهي بسواتي
وحلفتي يمين الله ما منك اثنتين=وانك ملاك دون كل البناتي
وانك على عهد المودة تسيرين=ولا تسمعين أهل الحسد والوشاتي
وصار اليمين ستار خلفه توارين=ورماح غدرك بالخفا مشرعاتي
وبان الغدر سم جرى بالشرايين=الله عسى يسقيك سم الفعاتي
كلي سقيتك حب واليوم تنسين=تقولين حلم ايام واليوم فاتي
خذتي الهوى لعبه على ما تحبين=لين عصفت بالهوى عاصفاتي
من زينك يا بنت بالشعر تزيين=من صورك بابياته الطايلاتي
انا من غرامي قلت كانك تذكرين=قلت الخجل صاب البدر من مناتي
وصرتي بشعري في العذاري تباهين=تقولين انا شمس العصر في حلاتي
زينتك بشعري ولا غربك الزين=ما زانتك صبغات حمر الشفاتي
صورتك بالشعر حزام ورياحين=واثرك هضاب وشوك ما به هداتي
رسمتك سحابه خير قطر تنفين=فزت لك الصحراء زهور ونباتي
رسمتك مهاه للجميله تقودين=واثرك قطيعه وضيعتها الرعاتي
واثرك غراب يوم سدل الجناحين=كنت احسب اني شايف لي قطاتي
بالشعر غليتك على كل غاليين=واثرك دنيه وتعشقين الدناتي
وبالشعر عاتبتك عتاب المحبين=انا من يسوم الروح لك يا غناتي
توسلت لك خايف على حب عامين=عامين لكن في حسابي مئاتي
ناديت لكن لي ابد ما تسمعين=عمري وروحي فكري في ثباتي
حذراك للشينات عمري تماشين=عديمات اصل اخلاقهن دانياتي
غاب الولي عنهن ولعبن بحبلين=يا خس واليهن وخس الولاتي
ما همهن في الناس زين ولا شين=وقلوبهن من حقدهن مظلماتي
وقلتي وربك لو يكونا ملايين=ما غيرن بالطباعهن من سماتي
تحسبين انك بالمهافه ترقين=كيف الصعود يكون للهاوياتي
وخنتي وبعتي كل عهد وايامين=ما عاد يفرق بين ماضي واتي
وصرتي مثل غيرك برخص تبيعين=يا مرخصتني ما بقى لك غلاتي
صبري نفذ واليوم ثارت براكين=مظلوم انا وباكر تحل ادعواتي
سمعي عسى من بعدها ما تسمعين=سمعي دعا من صار قلبه حصاتي
ادعي عسى من ناضرك ما تشوفين=وتطحن بك الايام طحن الرحاتي
وعساك عوق منه ما عاد تبرين=عوق تشافق له قلوب العداتي
ويالله عسى يحتار فيك المداوين=تبين الممات ولا يجيك المماتي
ويالله عسى كف الندامه تعضين=تندمين يوم انه يفوت الفواتي
وتبكين دم يسيل من مقلة العين=وتحتار امك عن عناك وتحاتي
عسى ما تلاقي من له القلب تهدين=وان حصل ادعي عساك الشتاتي
يا بلوة اللي وسط بيته تعيشين=ساهي وحوله شب جمر الغضاتي
عسى بعمرك ساعه ما تهنين=وتمضي حياتك بين هم وشقاتي
يا بنت قلبي وين مثله تلاقين=قلبا عطاك الحب ما قال هاتي
جيتك وروحي شلتها لك بكفين=وفي التاليه رمح الخيانه جزاتي
يالله عساك النار يا أم وجهين=كله انكشف لا ما تفيد العباتي
ويالله عسى تلبسك جن وشياطين=وتكونين مدعاة الحكي والشماتي
يا حية رقطا تقود الثعابين=باكر تحن ايامك المعتماتي
وباكر على فعلك بمثله تجازين=ظلم المشاعر ما تحكمه قضاتي
بيني وبينك تحكم ايام وسنين=وانا شاهدي قلبا من الغدر ماتي
ويا دمعة التمساح لالا تذرفين=العيون رغم ادموعها كاذباتي
لا ما عرفتي الحب لا ما تحسين=وغدرك تعدى غدر ذيب الفلاتي
الذيب يعوي قبل يغدر بمسكين=وانتي غدرتي خافقي في سباتي
لو كان غدرك في كفوف الموازين=لكان رجح كل غدر البناتي
انتي السبب سقتي على القلب جرحين=غدر الغرام وموجع الذكرياتي
وانتي السبب واليوم لالا تلومين=وان جاك باكر شوفي اشلون يأتي
والله لاكتب وافضحك في دواوين=وارقص واغني يوم خبر الوفاتي
وارسم لاهل العشق قلبا وسهمين=وقصة خيانه ما روتها الرواتي
ويمين لانشر فوق اسمك عناوين=واشهرك من قاصي اليمن للفراتي
ومن غرب هالدنيا الى قاصي الصين=ديوان غدر فيه كل اللغاتي
والبادي اظلم سنة العين بالعين=والا فذي لا عادتي ولا صفاتي
ويا شبه انسانه برأس ورجلين=اعوذ بالرحمن منك بصلاتي
|