لاصرت تعشق لك خليل(ن) وتهواه


من عقب ما كان الهوى ما يهمك


من عقب ما كنت اتمناه منواه


صار الهوى ايخالط عروق دمك

لكن حذاري من هوى يبعث الأه


من أه قلبك ماهي بأه فمك


اعشق واسهر واعشق الخل واتلاه


طارد خياله لين طيفه يضمك


صعبة تلاقي بالوصل شط ترساه


وصعبة يبادلك الهوى ربع جمك


مدامها سلومي لها الفخر مدعاه


رح للتي من طق الأصبع تلمك


درب الهوى في داخلي طاب مسراه


وأخاف لا يدق الهوى باب ذمك


ودي أحبك لكن الوضع مأساه


ودي وخوفي إنك تدس سمك

ودي أحبك لكن العرف مبداه


إني بنية سترها ما يهمك


ودي افضفض وانفض الهم والأه


وأخاف غمي يفتح لباب غمك


خدي شبع من لقمة الملح والماه


تعال مسح دمعتي بطرف كمك


تعبت أغني لك من الشوق عزاه


عزاه أنادي لك ولاني بيمك


لوكل حظ(ن) يجلب اللي تمناه


ياليت حظي جابني بنت عمك