أنا بدوي واحـب طـاري البـداوه
يامعذربين البدو مافيكـم إحسـاس
قالو بدو قلـت الصفـى والنقـاواه
يازين شوفتهم على الضوء جـلاس
...
قالو بدو قلـت الكـرم والنخـاوه
وأفعالهم فى ذمتى ترفـع الـراس
قالـو بـدو والبـر فيـه الشقـاوه
قلت الوناسه عندهم فوق الاطعاس
قالو بدو ونشـوف فيهـم قسـاوه
قلت الخشونه يامعذرب لهم سـاس
ابن البداوه صلف ما بـه رخـاوه
اليا زهمته جاك ماهـوب يحتـاس
بينه وبين الاش حـرب وعـداوه
وحلفه مع أهل الطيب والاش ينداس
شف لك من البدوان واحد وخـاوه
حتى تفرق بيـن مطلـق وعبـاس
وان كان ما صدقـت عالـج وداوه
قلبك مريض وفيه حقـد ٍ وسـواس
فى مجلس البـدوان تلقـا حفـاوه
وترحيبهم لضيوفهم مالـه اقيـاس
ويقدمون الطيب من عـود جـاوه
في سلمهم طيب ومعـزه ونومـاس