............... اذكر الله ياخفوقي

إذا المراجل لبسة شماغ وعقال

قل للعذارى يلبسن العمايم

ما عاد تفرق بين حرمه ورجال
دام الفعايل تشبه البعض دايم

المرجله ماهيب كلمه وتنقال
وتروح ماراحت هبوب النسايم

ولا خشونة صوت أو رفع الأثقال
أو رزة صدور وفعل الزلايم

ولا هي بعد مفتاح موتر وجوال
ولا ردى لسانن حديثه شتايم

المرجله شيمه عن القيل والقال
رفيع نفس حر بالجو حايم

المرجله عقل وزن وزنه جبال
ودون العقل وش فرقنا والبهايم

المرجله ياخوي هي طولت البال
هي العزم هي الصبر بالظلايم

فيها الكرم عزه ودله وفنجال
فيها خفوقك عن ردى الطبع شايم

والدين لامنه خذا القلب منزال
مشى طريق الحق وأبليس نايم

حتى صلاتك مع جماعات ورجال
في خيرها ياخوي نعم الغنايم

ولامن نصف ليلك قم وصف هالبال
ياعظم أجرك بين ساجد وقايم

ولا من رفع ربي لكل شخص الأعمال
حسن الذكر لا قالوا فلان صايم

وخلك شريف القصد ياطيب الفال
سوء المقاصد فالبيوت الهدايم

وأحذر تبيع النفس في درب الأنذال
وأترك خوي إبليس راع النمايم

النفس خيل لك إذا كنت خيال
ومن لا قوى نفسه قوته الهزايم

ولا صرت ماتدري لويش أنت رجال
والله خساره فيك ذبح التمايم!!