تغاريد تغريدلكل ماهو جديد

‏​نطوي مع الأيام عام ورا عـــــــام ===== وتـمـر ساعات الفرح في دقايق

أيام راحت بالعمر مثل الأحـــــلام ===== يـــــوم بها زعلان وأيام رايق

درست في دنياي وأتعبت الأقـــدام ===== وبدلت عن بعض الطرايق طرايق

وكفخت بأفكاري كما الطير لاحـام ===== وماعاقني عن ماكر العز عايق

ياصاحبي خذني معك سيف وحزام ===== وياك في وقت الرخا والضوايق

أخوك بالفزعات ضاري وعــــزام ===== يشوقني للطيب والخير شايق

وترى البشر ياخوك منقسمه أقـسام ===== بين الردي والطيب شفت الحقايق

لقيت من صلى وزكا ومن صــــام ===== ولقيت منهو لأقرب الناس بايق

ولــقيت من قــلبه حقودٍ ونــمـــــام ===== ولـقيت من قلبه يعز الرفايق

ولقيت من يبني الأمل فوق الأوهام ===== واللي يموت ولا يعرف العوايق

ولقيت من يملك بساتين ووأنعـــــام ===== واللي من الحاجه ينام إمتضايق

الله خلق هالخلق ساده وخـــــــدام ===== ذي دبرة الرحمن رب الخلايق

وآخرك يابن آدم ترى قطعة الخـام ===== أمرٍ أكـــيـــــد ومـايبيله وثايق

يالله عسى ماكون قطاع الأرحـام ===== وعساي من عقب القبرفي حدايق

جاك الكلام وخذ معه بصمه إبهـام ===== أن الــعــمــر كله مجرد دقايق