ياقبر أنا بنشدكـ وش حال راعيكـ,,..؟

مقدمتي ثلاث ابيات نتيجة تذكري لجدي الشيخ /حسن بن عبدالله بن شارع الدوسري بعد الصلاه وكان يتكئ على مركا (معناز)

لا ياوجودي يوم عاينـت مركـا
هبين الامام وبين صفـه الامامـي

بغيت احط المركى من تحت يمناه
لامالقيته ياعـرب وش علامـي

روّح وخلا ناس اليـوم ترجـاه
عساه في الجنه عزيز المقامـي

وفي العيد الذي يلي وفاته رحمه الله تهيضت وقلت هذه القصيده واترككم معها:

لاشك كل العيد فرح وتباريـك

مير البلا ذكرى الحبايب بالاعياد

وين الذي لاصبحت لينه يهنيـك

بوسة يديه تبدّل الحزن باسعـاد

.

.
.

ياقبر انا بانشدك وش حال راعيـك

شيخٍ نزل عقب المراقيـب بالحـاد

شيخٍ يقـوم الليـل يسجـد لواليـك

شـيـخٍ وَرِع صــوّام لله عـبّـاد

عسى حقوق المزن ياقبـر تسقيـك

ينشي المطر من مزن له برق ورعّاد

.

.

ياتـل قلبـي يـوم جـا علمهـم فيـك

تـل الرشـا لا تـل محّـال مـعـواد

وياحن قلبـي حـن صوفـات لبريـك

ولا كمـا منشـار فـي يـد حــدّاد

وجدي على جـدي وجـود المهاليـك

غليّـم معـه شايـب ضريـرٍ وينقـاد

بوسط الخلا ضاعوا وفي اليمّه تشكيك

ولا عيّـنـوا عــدٍ ولا عيّـنـوا زاد

ذيـبٍ هجدهـم لـه انيـابٍ مشاويـك

سرى على ورع المساكيـن الاجـواد

صـاح الـورع يابويـه الله يخلـيـك

صوت ّ.. وصارخ.. لكن الصوت مافاد

نادى الأبو يافلان وينـك وانـا افديـك

دوّر .. تسمّع .. لكن الصمت قد سـاد

عيّـن وليـده وسـط دمـه مسافيـك

ضمّه وفاضت روح ذا العـود بألهـاد

فمرحـوم ياشيـخٍ نديّـه يمانـيـك

مانته لبذل الطيـب حاسـب وعـداد

طيبك وصلهم في الحسا لين واديـك

صيتك وصل للخلـق أدنيـن وبعـاد

في المرجله والطيب عالـي مبانيـك

بنيت فـي راس المراقيـب امجـاد

بو ماجد المنعـور ريـف المهاليـك

مـن لابـةٍ ذربيـن للطيـب اسيـاد

يامن جعلت الطيـب عبـدٍ باياديـك

تعشق جزيل الطيب وتفعلـه لا كـاد

يامكرم الطرقي وكل ضيف ناصيـك

ياما ذبحت الحيل جمعـات وافـراد

كم جاك من محتاج مستنجـدٍ فيـك

لانصكّ باب الرزق بقفول واصفـاد

يامن ضعوف الخلق بعد الله ترجيـك

ثكلى ويتامـى بيـن صـادر وورّاد

لامن زما ستر المجنـى لجـا فيـك

تحشد لـه القـوات بجنـود وعتـاد

لاصكـت الدنيـا فـرود وبلاجيـك

وانقطعت الاحوال مع خط الامـداد

تبقى لطيـر الجـو مدفـع بوازيـك

سقم لحريب الارض .. مفني للاجناد

ياطيب ذا الشايب لو اني اباحصيـك

ماتكفي اوراقي ولا بحـوري مـداد

كـل العـرب ياشيـخ والله تغليـك

ياصافـي النيّـه وياطاهـر فــؤاد

كـل القبايـل والله ياشيـخ تنعيـك

وكل الدواسر قوّموا لاجلـك حـداد

.

.

مانيب من خوف ن على حالك ابكيك

لكن فراقك صعب ياخيـر الاجـداد

عيني تهل الدمـع لا حـل طاريـك

والقلب راكز بـه كلاليـب واوتـاد

والفكر طول الوقت دايـم يناجيـك

واسامر الذكـرى ويجفانـي رقـاد

ابكي على ذكرك ولانيـب ساليـك

واون من جمرن بهالجـوف وقـاد

لو كان بيردك دمع عيـن ترجيـك

لاقضي حياتي بين حـزن وتوجّـاد

عسى الولي من لاهب النار ينجيك

وفي جنة الفردوس نازل وخـلاد

يالله انا باطلبك ياربـي وادعيـك

يامنجيٍ يونـس ويامهلـكٍ عـاد

ترفق بشيـخٍ ماتقـرّب نواهيـك

شيخٍ حياته بين مصحف وسجّـاد

شيخٍ يصلي لك الى صايح الديـك

صافي نوايا مابه اضغان واحقـاد

وبالعيد كلٍ يهدي احلى التباريـك

وانا مع ذكرى الحبايب بالاعيـاد







مما راقـ,. لي

دوام الحال من المحال
هذه سنة الحياة
صح لسان شاعرها وسلمت يمينك على النقل

الله يرحم الحال .. و مثل ما قال اخوي سلمان ..

دوام الحال من المحال ..

صح لسان شاااعرها .. و يعيش نااقلها ..

تحيااااااتي لك ..

الله يعطيك العافيه

دمت بخير

صح لسان شاعرها ونقلها
ويعطيك العافيه
اسير الشوق

الله سعافيكُم عالمرور العـ طر ..